بعد السلام والمرحبة يا ولاد بلدنا يا طيبين
نفرش كلام المصطبة واضح لكل السامعين
مصر الحبيبة الطيبة أم البنية والبنين
إيش حالها فى عز الصبا إيش حال ولادها المخلصين
وسط العواصف مركبة بين ريح شمال وريح يمين
.
يا ابن البلد يا ابن البلد الوقت وقتك يا ولد
يا قلب مصر ونبضها
يا ابن البلد بسرى بطولها وعرضها
يا ابن البلد يا صبحها
يا ابن البلد يا ريحها
يا ابن البلد يا قمحها
يا ابن البلد يا رمحها
يا ابن البلد يا نور سماها وأرضها
< < <
حطة يا بطة يا دقن القطة
بابا جى وشايل الشنطة
إيه فى الشنطة؟ فيها مافيها
كذب وبولوتيكا وأونطة حطة يا بطة يا دقن القطة
بابا عشان خدها بالملحق بقى ظابط
واتعين ملحق وأترقى سفير فوزير
إيه السر؟ السر فى بير
السر فى طرف النبوت واللى يحل السر يموت
ياما نفسى يا بلدنا يا شابة يبقوا الوزرا بفلاد فوت
عمره ما فكر فكرة وصابت عمره ما نبت زرعة وطابت
يزرع سكر يطلع شطة حطة يا بطة يا دقن القطة
